ഇസ്ലാമിക് ഫെമിനിസം;ഒരു പുനർവായന

ഞാനൊരു വഫിയ്യയാണ്; ഒപ്പം ഒരു ഫെമിനിസ്റ്റും
- Raseena Wafiyya Thathrampally -

ഈ തലവാചകം നിങ്ങളിലുണർത്തുന്ന ആകാംക്ഷ എത്രത്തോളമാണെന്നറിയാം. പരിശുദ്ധ ഖുർആൻ മുഴുവൻ വിശദീകരണ സഹിതം പഠനം നടത്തിയ ആറായിത്തിൽപരം പ്രവാചക വചനങ്ങളിലൂടെ കണ്ണോടിച്ച ഒരു മതബിരുധധാരിണിക്ക് എങ്ങനെ ഒരു ഫെമിനിസ്റ്റാകാനാവും? ഉത്തരം  മറ്റൊന്നുമല്ല ,ഇവയെല്ലാം തന്നെയാണ് എന്നെ ഒരു ഫെമിനിസ്റ്റാക്കിത്തീർത്തത് എന്നതാണ്. അതെ, ഞാനൊരു ഫെമിനിസ്റ്റാണ്.ഖുർആനിക വചനങ്ങൾക്ക് 'നൂതന' വ്യാഖ്യാനങ്ങൾ നെയ്തെടുത്ത് ഇസ്ലാമിനെ ഒരു സ്ത്രീപക്ഷ വായന നടത്താൻ 'ശ്രമിച്ച ' ആമിന വദൂദിൻ്റെയോ ജിഹ്വയും തൂലികയമുയർത്തി അത്തരം ചിന്തകളെ ലോകത്ത് വെള്ളവും വളവുമിട്ട് വളർത്തിയ ഫാത്തിമ മെർനീസ്സിയുടേയോ അസ്മാ ബർലാസിൻ്റെയോ മുഖവും മനസ്സും തുറന്നിട്ട് മുസ്ലീം സ്ത്രീയുടെ ലജ്ജയെ പാടെ തുടച്ചു മാറ്റാൻ ശ്രമിച്ച ഖദീജ മുംതസിൻ്റെയോ ഇന്നിൻ്റെ തരംഗമായി മാറിയ ജാമിദ ടീച്ചറുടെയോ പിൻഗാമിയായിട്ടല്ല. മറിച്ച്, സ്ത്രീക്ക് ജീവിക്കാൻ പോലും അവകാശം കൊടുക്കാതിരുന്ന ഒരു കാലഘട്ടത്തിൽ അവളുടെ കാൽചുവട്ടിൽ സ്വർഗ്ഗം വെച്ച് കൊടുത്ത് അവളെ ആദരിച്ച, വിമർശകരുടെ കണ്ണിൽ കരടായിരിക്കെത്തന്നെ ലോക രാൽ മുഴുവൻ അംഗീകരിക്കപ്പെട്ട മഹത് വ്യക്തിത്വം  മുഹമ്മദ്(സ്വ)യുടെയും വാഗ് വൈഭവവും  ഗ്രാഹ്യശക്തിയും കൊണ്ട് ഒരു സമുദായത്തിൻ്റെ തന്നെ വിജ്ഞാന സ്രോതസ്സായി മാറിയ പത്നി ആയിശ(റ)ടേയും പിൻഗാമിയായിട്ട്....
             'ഫെമിനിസ'മെന്ന പദത്തിന് സ്ത്രീയുടെ അവകാശങ്ങൾ അംഗീകരിച്ചു കൊടുക്കുന്ന പ്രത്യയശാസ്ത്രമെന്നാണ് അർത്ഥമെങ്കിൽ 'ഫെമിനിസ്റ്റ് ' എന്ന വിളിപ്പേരിന് മുഹമ്മദ് (സ്വ)യേക്കാൾ യോഗ്യനായ മറ്റൊരാളില്ല എന്നാണ് ഞാൻ വിശ്വസിക്കുന്നത്. കാരണം സ്ത്രീ മനുഷ്യവർഗ്ഗത്തിൽ പെട്ടതാണോ എന്ന ചർച്ച വരെ പിൽക്കാലത്ത്  പുരോഗമനത്തിൻ്റെ പറുദീസകളായ യൂറോപ്യൻ രാജ്യങ്ങളിൽ വരെ നടന്നിട്ടുണ്ടെങ്കിൽ മുഹമ്മദ് (സ്വ)യല്ലാതെ മറ്റാരാണ് ലോകത്ത് സ്ത്രീ ശാക്തീകരണത്തിന് തുടക്കം കുറിച്ചത്? എന്നിട്ടും സ്ത്രീയുടെ അവകാശങ്ങൾ നിഷേധിക്കുന്നുവെന്ന പേരിൽ മറ്റേതു മതത്തേക്കാളും ഇസ്ലാം മതം വിമർശനങ്ങളേൽക്കേണ്ടി വരുന്നു എന്നത് ആശ്ചര്യകരം തന്നെ

     വാസ്തവത്തിൽ,ഫെമിനിസ്റ്റുകൾക്ക് തെറ്റുപറ്റിയത് 'സ്ത്രീ - പുരുഷ തുല്യത ' എന്ന അവരുടെ ശക്തമായ നിലപാടിലാണ്‌.തികച്ചും വ്യത്യസ്തമായ ജൈവിക -മാനസിക ഘടനകളുള്ള രണ്ടു സൃഷ്ടികൾക്ക് തുല്യത നടപ്പിലാക്കുക എന്നത് ക്ലേശകരമാണ്. എന്നല്ല, ഒരിക്കലും പ്രായോഗികമാകാത്ത ഒരു ഉട്ടോപ്യൻ ചിന്താഗതിയാണതെന്ന് വേണം പറയാൻ. അപ്പോൾ പിന്നെ അങ്ങനെയൊക്കെ വായിട്ട് കീറാൻ അവരെ പ്രേരിപ്പിക്കുന്ന ഒരു വസ്തുതയുണ്ടാകുമല്ലോ ? ആ വസ്തുതയെന്തെന്ന്  ഒരു പഠനം നടത്തുക തന്നെ വേണം .അത്തരമൊരു പഠനത്തിലേക്കുള്ള ഒരു ചുവടുവെപ്പ്. വിമർശനങ്ങളേറെയുണ്ടാകുമെന്നറിയാം. ഹൃദ്യമായി സ്വാഗതം ചെയ്യുന്നു. നിഷ്പക്ഷമായി ചിന്തിക്കാനും അതിലൂടെ തിരച്ചറിവ് നേടാനും നിങ്ങളിലൊരാൾക്കെങ്കിലുമിത് സഹായകമാകുമെങ്കിൽ ഏത് വിമർശനങ്ങളേയും നേരിടാൻ സജ്ജമാണീ തൂലിക,അതിലുപരി പകർന്നു നൽകപ്പെട്ട പ്രചോദനങ്ങളും. വായിക്കുക, ചിന്തിക്കുക, പ്രതികരിക്കാം, വിമർശിക്കാം....
                                                      (തുടരും)